السبت، نوفمبر 10، 2007 على الساعة 16:14

لقيت الخبر هذاية بالصدفة... خبر الحقيقة يحزن برشة... و لكنو زادة يفرح برشة..... الخبر إلي نشرتو جريدة "الشروق اليومي" الجزائرية (مش "الشروق" متاعنا) يقول أنو التجار الجزائريين يستعملو في جرايدهم كعملة نادرة يقايضو بيها مقابل تمريرهم بضائع أخرى مع التوانسة إلي في المناطق الحدودية التونسية الجزائرية... بمعزل على مدى اتساع و معاني الظاهرة الغريبة هذية (إلي تشبه لظاهرة استعمال الملح مثلا كعملة نادرة في العصور الغابرة).... نحس واحد من الناس بالحزن لأنو ما نراش حتى سبب عضوي و إلا ثقافي في أنو التوانسة يخزرو لصحافتهم الوطنية مش عملة نادرة تستحق الشراء كيف الصحف الجزائرية.... لكنو الخبر هذاية يفرح لأنو يوري إلي التوانسة يحبو يقراو "السلعة" الباهية... ربما هذاية مثال يصلح للسيد صالح الحاجة إلي يعتبر (في مقال "قم و اقرأ صحيفة") عزوف التوانسة على شراء جريدتو ناتج على التقرنيط؟؟؟!!!

مرسلة بواسطةهيئة تحرير بودورو
التسميات:

هناك 4 تعليقات:

Clandestino يقول...

نفس الظاهرة موجودة في الحدود التونسية الليبية أما بالمقلوب أي انو الاخيان الليبيين يموتو على الصحف التونسية
و من النوادر انك بأخبار الجمهورية أو الإعلان تنجم تسلكها مع العون الديواني الليبي

لهنا ما نعرفش المشكلة في الفرق بين الصحافة التونسية و الليبية أم في الليبين في حد ذاتهم ;)

Werewolf يقول...

يا كلاندستينو يزي ...باقي شاد صحيح في الليبية ;-)
ا

Tarek Kahlaoui يقول...

لهنا ما نجم نمشي كان مع الفرضية الثانية مع كل احتراماتي الأخوية و القلبية

gouverneur de Normalland يقول...

أنا نعرف اليبية ...شغفهم الكبير مش على الاخبار و المقالات السياسية في الصحف التونسية...لكن بما أنهم يتابعوا البطولة التونسية لكرة القدم فيحبو يطّلعوا على اخر اخبار الجمعيات لا أكثر و لا أقل

و بالعكس...شفت عدة اصدقاء ليبية يضحكوا من مشتوى بعض المقالات في تونس

شفتوا يا صحافة بودورو ؟؟؟ خليتونا ضحكة حتى في ليبيا