بعد المعمعة الكبيرة بين سمير الوافي و عدد من مستعملات الفايسبوك , و اللي كنا حكينا عليها في تدوينة سابقة , أدلى سمير الوافي بتصريح لإذاعة الموزاييك و قال فيه اللي فمة شكون انتحل اسمو على الموقع الاجتماعي و استخدموا لغايات دنيئة الغرض منها تشويه سمعتو .
وقتها قلنا اللي التصريح هذاكة ربما كان تحت وطأة (الصدمة) خاصة و ان القضية خذات ابعاد اخرى و تدوالتها عديد الصحف التونسية (ورقية و الكترونية) و قلنا اللي من الطبيعي انو السيّد الوافي ينفي عنو اي علاقة بالموضوع و يحس بالخجل من كشف جوانب الشخصية متاعو و علاقاتو بالجنس الآخر من خلال المراسلات الخاصة على الفايسبوك, و عذرناه لثقافتو الالكترونية المحدودة , على ما يبدو ما كانش يتصوّر انو المراسلات هذيكة و الكلام اللي تقال فيها الكل , ينجّم يخرج للعلن, و انها(الانترنات) , فضاء مقنن كيفها كيف الحياة العامة و اي اعتداء من اي نوع كان يدخل تحت طائلة القانون .

إلا أنو سي سمير فاجأنا بحوارعملو في صحيفة الحدث متاع غدوة -الاربعاء 11 مارس 2009 -( و هذا موضوع آخر , انك في تونس تنجم تقرأ "صحيفة غدوة " اليوم الصباح و انت في بلاصتك رغم ان نظريات النسبية العامة و الخاصة و نظريات ميكانيك الكم تقول عكس ذلك)
قال فيه اللي فمة شكون انتحل صفتو و اللي هذا طبيعي لأنو من (الشخصيات العامة) و بالعكس قالك هو استفاد من الهدرة و ربح برشة اشهار للمنوعة متاعو ...
و على ما يبدو نسى انو مقالتو المعروفة و اللي نشرناها لهنا , اللي يحكي فيها على جرثومة الانترنات , و الميساج اللي بعثو لوحدة من البنيّات يهددها فيه بفضحها على اعمدة الصريح (قبل بنهار من نشر المقالة المذكورة) تأكّد اللي الوحش الآدمي, مروّع الفتيات على موقع الفايسبوك هو بيدو سمير الوافي متاع الصريح و متاع قناة حنبعل .
و هاذي قدامكم فقرة من المقالة اللي نشرها في الصريح يوم 31 جانفي 2009
لقراءة المقالة كاملة : الرابط

فماش شكون تساءل نهار كي يلقى مقال في جريدة يحكي على ملاعبي عندو مدّة ما ظهرش , قاللك ينتظر لفتة من المدرّب الوطني؟ و الا يحكي على مدرّب عائد من الخليج و يعدد الانتصارات و الالقاب اللي حققها و العدد المهول متاع الجمعيات اللي تحبّ تنتدبو؟ و الا مقال في الصفحة الفنية فيه مطرب يوعد الجمهور متاعو بالجديد و ببرشة مفاجآت يحضّر فيها للمهرجانات ؟ و الا يحكي على كتاب (ولا ديوان شعري) متاع احد الادباء , زعمة زعمة باش يأثّر في السّاحة الادبية و المشهد الروائي العربي؟؟

المقالات هاذية الكل هي مقالات اشهارية و لو بطريقة مقنّعة , و عادة تتم الامور بين الصحفي و المعني بالامر , و ادارة الصحيفة ممكن ياسر في بالها و ممكن مافيبالهاش لأنها في نهاية الامر مستفيدة بحكم حصولها على فرصة لملأ فضاءات كاملة في الاعداد متاعها و موش مشكل المحتوى (ديما خير من القص و اللصق) ..
و المقالات "المأجورة هاذي ماهياش مكلفة كيما يتصوّر البعض , بالعكس, المقابل ما يتعدّاش العشرات او مئات قليلة من الدينارات, و في بعض الحالات عشاء و سهرية في مطعم و الا حتى باكو دخان و قهوة و دبوزة ماء في مقهى راقي...

فـقضية الاشهار في الصحف التونسية معقّدة و ضبابية و فيها برشة جوانب خفية, فمة الاشهار المعلن و العمروف و المتعارف عليه (كيما الاشهار متاع اليغورت و المياه المعدنية و الفضاءات التجارية الكبرى...) و فمة الاشهار الآخر اللي يصير بطريقة غير مباشرة و يغلّط برشة قرّاء اللي يظنوا انو المقال او الموضوع عادي و يتقبّلوا كأي خبر آخر في الجريدة.
و مقالات اليوم تندرج في نفس الاطار أي الاشهار المقنّع , و المستفيد منو هو شركة الاتصالات اللي كانت فيما مضى حكومية , اتصالات تونس..فالعروض التجارية بمختلف اصنافها متاع اتصالات تونس مثّلت حدث آخر الاسبوع في الصحافة التونسية (و كإنو التخفيض على سعر المكالمة لخط "اولا" و الا "توّة توّة" هو خبر هام ينجّم يمثّل احد المشاغل متاع المواطن , و عرض كيما اللي يحكيو عليه (تنجّم تشرجي خطّك بمبلغ 500دينار) متصوروش انو يهم المواطن العادي اللي شهريتو بكلّها ماتجيش في حق الروشارج اللي يحكيو عليها.

من جهة اخرى اذا كان فعلا العروض التجارية متاع شركات الاتصالات ولات من الاخبار الوطنية الهامة و الجديرة بالتطية , وينهي عروض تونيزيانا ؟؟ علاش تونيزيانا ديما تمرّ عبر قنوات الاشهار المتعارف عليها , علاش ديما تشري فضاءات اشهارية في الصفحات الرئيسية و بالالوان ؟؟

احنا على كل حال منجموش نفهمو الموجة متاع الدعم و المساندة لاتصالات تونس و الانحياز الواضح في منافسة تجارية بين زوز شركات خاصة ... و نرجّحوا فرضية انو الجماعة (المحرري و رؤساء التحرير) ديما على الخط ...متاع عروض اتصالات تونس .
و ممكن ياسر انو دبّروا روسهم في عدد كبير من الكوارط و الخطوط ليهم و لوليداتهم و بنيّاتهم ...

كنا قلنا في التدوينة اللي فاتت اللي باش نرجعو بأكثر تفصيل للعركة المتواصلة (توة عندها اسبوع) بين الصحفي في جريدة الصريح و قناة حنبعل الفضائية سمير الوافي و عدد من الفتيات المشتركات في الشبكة الاجتماعية.
الحكاية ربما كانت تتعدى من غير ما تجلب الانتباه , لأنو من الطبيعي انو الصحفيين و مقدمي التلفزة و الممثلين و غيرهم يتعرّضو للنقد من الجمهور, و من الطبيعي كذلك انو درجة النقد و الحدّة متاعو تكون متفاوتة حسب كفاءة و نزاهة (و ساعات رداءة) الصحفي أو الفنان أو المقدّم. الا انو السيّد (آس دبليو) و بقدرتو العجيبة على تدوير الخواطر و الاصابة بالغثيان لكل من يقربلو او يشوفو حتى افتراضيا , كبّر المسألة و بلبزها و اللي كان يتصوّرو فيس و نجاح شخصي بالنسبة ليه (اي اقتحام الفايسبوك و الاحتفاظ بقائمة كبيرة من الاصدقاء) كشف الوجه الحقيقي متاعو و تسبب في الازعاج لمستعملي و مستعملات الفايسبوك في بلادنا.

فـحسب الموقع الاخباري "الصّـــــواب" , فمة زوز بنات قامو بالتعليق على الصفحة الخاصة بسمير الوافي على الفايسبوك و قدمو ملاحظات حول انتاجو في التلفزة و بعض كتاباتو الصحفية , الا انو ردّ عليهم بطريقة لا أخلاقية و سبّهم و اساء معاهم الأدب بما لا يليق بـ"صحفي تونسي". الشيء اللي خلّى الصٌّحفي "حمدي المسيهلي" يتبرّأ من تصرّفات زميله في تعليق في الفايسبوك(التعليق الثالث).

هيئة بودورو اتصلت بالفتاة المعنية (وهي مشتركة في مجموعة سمير الوافــي, اخرس من فضـلك

و استفسرت على اصل الحكاية, فاتضح انو سي سمير كان غالط في روحو , في بالو "طوم كروز" و الا "الان دولون" في زمانو, و ما مسيّب شيء , يبعث في المساجات و الرسائل الخاصة للبنات اللي يعرفهم و اللي ما يعرفهم , و على ما يبدو كان يتصوّر انهم البنات في الفايسبوك كلهم بنات ساهلين (اي في متناول سيادتو و تحت أوامرو في اي لحظة و اللي قلها نحب نحكي معاك تفقد الوعي و يغمى عليها 3 ايام ...) لكن هيهات....

في كل مرّة يتمّ فيها الحديث عن الرقابة و الحجب في مجال الانترنات في بلادنا إلا و يكون الفايس بوك هو الدليل الدامغ و الحجة الغير قابلة للدحض على وجود الصنصرة الممنهجة و الفيلتراج الاوتوماتيكي لعدد كبير من المواقع و المدونات. و القرار الرئاسي اللي اذن برفع الحجب على موقع الفايسبوك كان وضع العديد من التخصّصين في اخفاء الحقيقة و تغطية عين الشمس بالغربال في مآزق كبيرة و مواقف محرجة في عديد المناسبات.
فتوصّل الجميع الى تبرير موحَّد (منعرفوش شكون طلع بيه الاوّل ) وهو انو مسألة الفايسبوك كانت حالة شاذة و اجتهادات فردية و تصرّفات معزولة ماتعبّرش على السياسة العامة في البلاد . وتم اعتماد الرواية هذية كرواية رسمية و توضيح رسمي لعملية حجب الفايسبوك ,و تكرر الكلام هذا كيما صرّح "بوبكر الصغيّر" (مدير مجلة الملاحظ) على قناة حنّبعل , أو كيما ردّ السيّد وزير العدل و حقوق الإنسان على مقدّم برنامج 'في الصميم" على قناة البي بي سي العربية (حلقة الاثنين 26 جانفي 2009)...

الصحف التونسية, باش توضّح المسألة للمواطن البسيط اللي بعمرو ما سمع بحاجة اسمها فايسبوك في حياتو , و باش ما تخلّيش فرصة لنفس المواطن البسيط باش يتساءل علاش كل مرّة , يتسأل فيها صحفي او مسؤول على الفايسبوك ...يتلعثم و يدخل بعضو و يبدأ يجاوب بتوتّر واضح و بطريقة غير مقنعة.
و احنا في بلادنا -والحمد لله- المواطن مهما كان تكوينو او خلفيتو او وضعو الاجتماعي, طوّر آليات ينجّم من خلالها يقرأ الكلام اللي ماتقالش و يعرف الحاجات الغير معلنة , فقط من خلال حركات المسؤولين و طريقتهم في الخطاب و التعبير خاصة في المواقف المباشرة

الصحف التونسية كيما قلت باش تجنّب المواطن التساؤلات هذية الكل و باش تقصّر عليه الثنية فإنها اختارت طريقة التشويه و اعطاء صورة مغلوطة عن الانترنات عموما و الفايسبوك خصوصا . و اللي عمرو ما دخل الانترنات كيف يشوف عنوان كيما العنوان على الصفحة الأولى متاع الحدث ما ينجّم كان ينفر من الفايسبوك و يسبّلو جد بوه الاول, و اذا نهار من نهارات واحد من اولادو جبدلو على الموقع هذاية فالاكيد انو باش يحلف على الانترنات كان مازالت تدخل دارو , فالفايسبوك حسب "الحدث"هو " جنس-دعارة-مخدّرات-عنف - ارهاب- تطرف - ممنوعات..." و فوق هذا الكل (و بما انو الظرف الحالي هو ظرف متاع حرب في غزة ) زادوا المخابرات الأمريكية باش حتى اللي يبدى متسامح مع الامور اللي ذكرتها توة , مستحيل يسمح للمخابرات الامريكية تجنّدوا او تاخذ معطياتو الشخصية على الفايسبوك و ربما تستعملها لضرب الفلسطينيين.

صحيفة البيان من شيرتها عملت ريبورتاج حول نفس الموضوع , سألو فيه مجموعة من الشباب على الفايسبوك و كانت الردود في مجملها تأكّد انو الموقع هذا هو وسيلة لتمضية الوقت و ربط العلاقات و الاستماع لموسيقى الهاوس (بالذّات) و مشاهدة مقاطع الفيديو .
و رغم انو الريبوتاج متاع "البيان" يبقى ديما اكثر حيادية و حرفية من اللي تنشر في "الحدث" و اعطى صورة اقرب للواقع و حكى على امكانية تكوين مجموعات بين المشتركين تجمع بيناتهم لأهداف يمكن انها تكون نبيلة كيما دعم و مساندة غزة...الا انو زادة فمة الجانب الآخر وهو المبالغة في تصوير الخطر متاع الفايسبوك. باعتبار معظم الشباب اللي سألوه هو من تلامذة الثانوي, و معظمهم كان في
المقاهي اللي فيها الـwifi , فتتوضح الصورة و يظهر الفايسبووك كخطر يتهدد المستقبل الدراسي لابنائنا .




أما المقالة الثالثة متاع الصريح ليوم امس فيمكن ادراجها في نفس السّياق (الحملة على الفايسبوك) و لكننا باش نفردوها بتدوينة مستقلّة على خاطر الحكاية فيها برشة خفايا و تعقيدات على موقع الفايسبوك بيدو. و فيها برشة جزئيات شخصية تمسّ من شخص السيّد "سمير الوافي" و عدد من مشتركات الفايسبوك.
البقية في التدوينة الجاية

خلال العدوان الاسرائيلي الاخير على قطاع غزة, تعرّضت قناة الجزيرة لـ"عدوان" من نوع آخر من طرف "الصحافة الوطنية" في بلادنا بسبب عدم تغطية المظاهرات "العفوية" المساندة و الداعمة للشعب الفلسطيني في تونس, و بسبب استضافتها -عبر الهاتف- لعدد من الشخصيات التونسية الممثلة للمنظمات الحقوقية و النقابية و احزاب المعارضة .فعلى ما يبدو فإن تجاوز الجزيرة للناطقين الرسميين باسم الشعب و الحكومة التونسيين و الوجوه المعتادة في مثل هذه المواقف كيما سي بوبكر الصغيّر و سي برهان بسيّس , و اعطائها الفرصة لــ"مناضلي فنادق الخمس نجوم" لتغطية الاحداث , اثار قلق العديد من الأطراف, و ربما حرمهم من فرصة ذهبية لدعم رصيدهم.

فـ رغم انو النّاس الكل تعرف انو المظاهرات الشعبية العفوية(الحقيقة) تمّ قمعها و منعها , نقابية كانت او طالبية او تلمذية. و رغم انو الناس الكل تعرف كذلك أنّ المظاهرات اللي ماذابيهم تعدّيها الجزيرة هي تجمّعات انتخابية لدعم مرشّحي انتخابات آخر السّنة اكثر منها تظاهرات تنديد بالعدوان الاسرائيلي .و رغم انّو مكتب الجزيرة في تونس مغلق عندو سنوات, فالسيّد(ة) أ.م.ج كاتب المقالة اللي قدامكم في صحيفة الشروق مصرّ على اتهام قناة الجزيرة بالتشكيك في "التعاطف العام و التلقائي المنسجم شعبا و حكومة و مجتمعا مدنيا..."و و وصفها بــ "قناة التفتيت القومي و وقود الحروب الاهلية ...".

و يواصل سي إ.م.ج (ينجّم يكون اسم تنظيم كامل موش شخص فقط :اتحاد معاداة الجزيرة) فيصف قناة الجزيرة بـانها "قناة تفتقر إلى المصداقية..." و انّ العدوان الاخير كان مناسبة لـ"تشيّع تلك القناة النّزاهة الفكرية و أخلاقيات المهنة الصحفية إلى مثواها الاخير..."

احنا في هيئة بودورو منجّموش نلقوا باللوم على الجزيرة في حالة كيما هاذي, فلوم الجزيرة غير مبرّر و هي ماهياش مطالبة باش تكون زادة بوق دعاية في انتخابات لا تخصّها لا من قريب و لا من بعيد , اللهم السيّد الصحفي متاع الشروق يحب يعمل للاخيّان في قطر نسخة جديدة من قناتنا العزيزة (تونس سبعة).
و احنا نستغربوا انّو الاتّهامات هاذي تصدر من صحيفة الشروق بالذّات, اللي أسّست لمدرسة جديدة في العمل الصّحفي , و احدثت ثورة في مجال نقل المعلومة بأيسر الطرق و اقل التكاليف. ففي صحيفة الشروق فمّة قسم كامل معروف بقسم " مراسلي بيت الصّالة" ,اي الصحفيين اللي يسهروا ليلة كاملة قدّام التلفزة يقلّبوا الفضائيات و ينقّلوا كل ما يقوم المراسلون الفعليون بارساله لقنواتهم و ينشروه على اعمدة الشروق مسبوق بالعبارة الشهيرة "تونس- الشروق- استماع". وباعتبار قناة الجزيرة من المصادر الرئيسية لصحافة الاستماع فنعتها بعدم الحرفية و عدم النزاهة يمسّ كذلك من صحيفة الشروق نفسها و يحطّها في موقف متناقض يصعب فهمه.و يخلّينا نشكّكو في نزاهة الواقفين على ما ينشر فيها و في اخلاقهم (من منظور انساني) ممّـا يرشّحها لنيل دورو نكران الجميل لهذا الشهر.

لقراءة كامل ملخّص "حلقة مع هيكل" انقر هنا.


و

طيلة الفترة الماضية تساءل العديد من القرّاء عن سبب الغياب المطوّل لهيئة بودورو, و اشنية اسباب الركود و عدم تحيين محتوى المدوّنة , و من جملة التأويلات هو انو الصحافة التونسية تغيّرت (نحو الافضل) و ماعادش فمة موجب لمدوّنة كيما مدوّنة بودورو..لكن هيهات..أن يصلح العقار ما أفسده الدهر, و ما يسمّى بالـ"صّحافة التونسية" مازالت على العهد في هتك الاعراض و التشهير و السبّ العشوائي ,و مازالت كذلك على الموعد مع الرّداءة و المغالطة و الابتعاد(قدر الإمكان ) عن قواعد و اخلاقيات العمل الصحفي ...و الحمد لله (على خاطر لوكان يصحّ الكلام هذا فماعادش فمة موجب لوجود المدوّنة )

نبداو اليوم على بركة الله مع مقالة نموذجية في اللغة الخشبية بقلم السيّد "علي بن نصيب" , المحافظ دائما على صورتو الوفيّ لنفسو ... مقالة -كالعادة- غامضة ضبابية غير مفهومة الاهداف و الدوافع, موجّهة للمناوئين ,"ادعياء النضال", "اصحاب الدكاكين المختصة في بثّ الاكاذيب", "نجوم الوقت الضائع", "الفهلويون الجدد"... و غيرهم من "مدمني التسوّل الحقوقي و المتمسّحين على اعتاب السفارات , مناضلي الفيرست كلاس و فنادق الخمس نجوم"

أحنا الحقيقة رغم اختلال مقالات السيّد علي بن نصيب و فقدانها الدائم لأبسط مقوّمات المقالة الصحفية النزيهة و الحرفية , الا انو ما نجّمو كان نلاحظو ببالغ الاكبار المجهودات اللي يبذل فيها بشكل عام و الرّصيد المتميّز للألفاظ و المفردات الخشبية اللي كوّنها طيلة سنوات العمل في صحيفة الصّريح ... اللي يرسّخ مكانتو كصحفي بودورو بامتياز , صحفي بودورو من النسخة الأصلية (الكلاسيكية) عكس النسخ المطوّرة من نوع مدير مجلة الملاحظ و بلعوط الجمهورية اللي بدأ يجني ثمار التفاني متاعو في ضرب اللغة (هنا)

.













.













.













.













.













.













.