الاثنين، يناير 02، 2017 على الساعة 14:11



قرأنا مما قرأنا خبرا مفصليا في تاريخ الصحافة التونسية، نشر في أكبر مواقع تونس الإخبارية انتشارا على الإطلاق (موقع موزاييك فم) بعنوان: "بعد الحركة اللاأخلاقية لممرضة: مدير مستشفى بن عروس يفتح تحقيقا".

المقال الحدث هذا ارتجت له الأرض وجعل مدونة بودورو تخرج من موتها الاختياري بعد ثورة 17 بش تعاود تعلق وتبعث لهذا الصحفي الشاب بوسام بودورو من الطراز العالي. فهو –واشباهه كثر الحقيقة-يشرّف تاريخ الصحافة التونسية البودورو العريق مستلهما من أباء البودورو ومؤسسيه كعبد العزيز الجريدي و صالح الحاجة وغيرهم كثير. (ننصحكم بجولة في تاريخ المدونة).


هات توة نحللوا المقال العبقري شكلا ومضمونا:

شكلا : 

نلقاو أن هالخبر المفصلي في تاريخ الأنباء التونسية هو أحد خمسة أنباء  ساقهم الموقع (الى حد كتابة التدوينة) ليوم  02 جانفي 2017  وذلك في خانة الأخبار الوطنية.  من بين خمسة أنباء , منهم  نبأ على أحوال الطقس. يعني في ظل المشاكل السياسية والاقتصادية والجيوسياسية الي تمر بيها البلاد، ما فما حتى نبأ يساق سوى أن فما مرى بعثت فقوصة لمرى أخرى في الصبيطار.
يعني  الصحافة التونسية كملت خدمتها و عملت جرد كامل للأنباء في كل شبر من الوطن وما فما شي ينجم يتناقلوه سوى خبر الفقوص الي يخيّط بين زوز تعاركوا في صبيطار ؟
يعني ممكن بعد أيام نلقاو المكي هلال يستفتح نشرة أخباره كالتالي : "شوهدت خالتك مباركة ملوحة بفقوصة في وجه خالتك زعيمة. الا أن خالتك زعيمة طالبت بحق الرد وأجابتها بصبع القابلة" ؟
توة المؤرخين بعد خمسين سنة وقت الي  يرجعوا للمواقع هذه بش يكوّنوا فكرة على تاريخ البلاد في بدايات 2017  ... شنوة بربي بش يكون تعليقهم ؟ "كانت 2017 سنة تراشق الفقوص بين كل فئات المجتمع ؟".



مضمونا : 

 قالك «وعلق مدير المستشفى ... على الحادثة، معتبرا أن الالتجاء إلى مواقع التواصل الاجتماعي أصبح ظاهرة, وقال في هذا الصدد إنه كان بإمكان المواطنة الاتصال بالإدارة ليتم على ضوء ذلك فتح تحقيق".
يعني رغم   الاعتداء الفقوصي الغاشم من قبل ممرضة تمثل المستشفى، العيب راهو يكمن في المواطنة الي في عوض تعتّم على الحكاية وتستعمل كمية الفقوص الي خذاتها  في حاجة مفيدة .. تعمل سلاطة مثلا , فهي –ربي يهديها- خذات في خاطرها وصورت الحادثة الأليمة ونشرتها على صفحتها. ما حقهاش. حقها عملت تبادل فقوص مع العاملة والفقوص  بالفقوص و البادئ أظلم. أو ربما –وهذا الحل الأمثل بالنسبة للسيد المدير-كان مشات عملت بيها قوادة باهية بين البيروات وتحت حس مس راهو ممكن المدير يكنبن لصديقتنا الممرضة  ويجعلها تفقّص  ..في اطار العدالة الفقوصية.

"وأضاف مدير المستشفى أنه من غير المعقول أن تقوم عون الصحة بتلك الحركة أمام الجميع
.. ايه ما حقوش. نورمالمون الممرضة تكلم المواطنة بكل هدوء و تقوللها : "اتنجم تجي حاجتي بيك لحظة على إنفراد ؟؟" .. ثم تهزها لتركينة من تراكن الصبيطار في أحد الكولوارات .. ووقتها يلزمها تلوح بفقوصتها بعيد على الأعين الرقيبة و بعيد على عين الحساد و الي يصطادوا في الماء العكر والي بالكشي –لاسمح الله- يأولوا الفقوصة تأويل خاطئ.

"وذكّر –المدير- في هذا الإطار بحجم الخدمات التي يقدمها أعوان الصحة داخل المؤسسات الاستشفائية"
اش مدخل زعمة خدمات أعوان الصحة في "هذا الإطار" (اطار التراشق بالفقوص) ... اش يقصد السيد المدير ؟  زعمة يحب يقول أن مش كان الفقوص متوفر ... وانما أعوان الصحة –في هذا الإطار- حريصين على التنويع و الإبداع ... ساعات فقوصة ... ساعات  قباحة .. ساعات يعريو على المواطنين ... أي سيدي المدير .. الخدمات متنوعة سيادك ربي يبقيك.

"ولفت أن الشاذ يحفظ و لا يقاس عليه ... مؤكدا أن الأبحاث الأولية أثبتت أن عائلة تتكون من حوالي 15 فردا أرادت الدخول بالقوة  .. وأشار إلى أن رفض الممرضة السماح لهم بالدخول هو ماتسبب في المشادة الكلامية وتوتر الأجواء" 
لا ما حقوش ... يعني بعد ماقرينا هذا يلزمنا نقولوا  : لا بالحق الممرضة عندها الحق في بعثان الفقوص. وممكن كارها عملت عدالة في بعثان الفقوص. هوما 15 يحبوا يدخلوا للصبيطار بالسيف , نرومالمون لكل واحد منهم فقوصة .. مش المغبونة الولية الي تحملت عبئ الفقوص الكل وحدها.
شعار المرحلة للسيد المدير -بين أسطر تصريحه : لكل مواطن يتكعلص قدام مستشفى يلزم ياخو بايو من الفقوص ...
وفي هذا السياق ..  وبمناسبة حلول السنة "الإدارية الجديدة" .. لا يسع هيئة تحرير بودورو الا أن تبعث للسيد المدير شخصيا ب فقوصة تونسية اصيلة  و للممرضة المهذبة فقوصة و الى كاتب المقال و رئيس تحرير موقع موزاييك  كل واحد فقوصة  ..فلكل نصيبه من الفقوص في بلد الفقوص الدائم .. هذا -طبعا-  بالإضافة الى ترشيح الصحفي اليافع الى جائزة بودورو لعام 17

و السلام. 

مرسلة بواسطةهيئة تحرير بودورو
التسميات:

هناك تعليقان (2):

Kaiser يقول...

https://www.facebook.com/thawrakram/photos/a.489791591057210.96606.430735696962800/1223963064306722/?type=3&theater

حبيت نشارككم مقال في موقع Kapitalis

غير معرف يقول...

وضع أليم اما كتابتك أضحكتني