على كل تلميذ في مدرسة البروباغندا, أن يتحلى بصفــــات المناور.., أولى أبجديات المــُــناورة, هي التمكــّــن من أساليب السفسطة.. أي محاولة إقناع الناس بالشئ و نقيضه.

وجب على القلم البودورو أن يتحلى أيضا بصفة الـــ" لا منطق".. والتي تقوم على الإنطلاق من فرضيات مقبولة للوصول لنتائج واهمة... وهو أسلوب مستهلك و مكشوف.. يفقد صاحبه كل مصداقية.. كمثال على إبداعات المسفسطين , ندرج المثل التالي:

الفرضيات : البلاد صاعدة.. العالم متحول .. أساليب الإنتاج تغيرت.. التكنولوجيا تطورت

النتائج: الدفاع عن حقوق العمال أضحى مضاربة

****

إن أراد الصحفي أن يتناول مسألة تســــلــّــق بعض الأشخاص و استغالالهم لبعض الأزمات الإجتماعية لتحقيق مآرب شخصية.. فذلك أمر مقبول.. لكن بشرط أن يتحلى الكاتب بدرجة محترمة من البحث و التحليل ... من ذلك أن يتجنب التعميم ,و أن يتحاشى "الحشو".. أي إقحام معلومات عامة و عـــمومية صالحة لكل زمان ومكان و محل إجماع.. وهي معلومات يلفقها الصحفي عنوة في مقاله الجاف, معتقدا أنه يضفي عليه نفسا تحليليا.... من المحبذ أيضا لو أصبغ مقاله بمثال حي يدعم به أفكاره, و يضع به إصبعه على موطن الداء دون لف ودون مراوغة.

أختم بمقولة لـــ"ماركوز" من كتابه " الإنسان ذو البعد الواحد" :

"... و ما الكلام في عالم الإنشاء العام إلا تنقيل للمترادفات و الألفاظ المتكررة وهو لا يبحث البتة في الواقع عن الفرق النوعي. إن البنية التحللية تعزل الكلمة الرئيسية عن مضامينها التي تهدد بنقضها أو على الأقل بوضع العراقيل أمام المعنى الذي تستخدم به في التصريحات السياسية والرأي العام. و الحق أن المفهوم المنزّل منزلة الطقس المقدس يُكسب مناعة ضد النقض"

أنموذج للذكرى: مقال علي بن نصيب - الصريح -3 جويلية 2008- العدد 2263


إضغط على الصورة للتكبير

أضغط على الصورة ... باش تقرى هالكارثة

أعـلـن فخامة الزعـيم "محمد كرومة" في رسالة عاجلة على جـريدة "الضريـح" , في عددها 2228 بتاريخ 29 ماي 2008, عن قلقه و رغبته في إيجاد حل جدري (نؤكد على كلمة جدري مش جذري) " للنازحين" لجمهورية الكرم ... هذا وقد أعرب في رسالته المقتضبة عن تذمره من هؤلاء النازحين وطالب بشدّهم إلى أرضهم في جمهورية تونس... و من جهة أخرى فقد أكّــد سيادته على أنه " اليوم لم يبقى في الكرم شبر واحد لإقامة مشروع سكني" و أنّ حتى أعـيان "الجمهورية الكرمّية" قد هجروها ... إلخ ...إلخ ... إلخ ...

هيّا يزينا من هاللوغة الخشبية ... و خلي نفهمو سي محمد كرومة ( الي نتصورو كتب هالقذارة عن حسن نية ) شنوة يتفهم من وراء مقال كيفما هذا:

- " اليوم لم يبقى في الكرم شبر واحد لإقامة مشروع سكني " : نعلمك يا سي محمد قبل كل شيء كانك نسيت (وإلا بالعاني طفيت الضو لبعض الأسباب هاو باش نفسرها) إلّي الكرم ما توفاش في حدود غابة الكرم الغربي كيما إنتي قلت و إنما توصل حتى للبحر وتحدها جنوبا خير الدين و شمالا صلامبو ... قلت نسيت و إلا طفيت الضو على خاطر كيف تقلي أنتي ماعادش فيها حتى شبر يتبنى, نسألك كانك عملت طلة على شواطئ الكرم وين فما "قلعة" قاعدة تتبنا (في بلاصة " نزل الشاطئ " سابقا ) متكونة من 8 طوابق و ما تبعدش أكثر من 4 ميترو على حافة البحر و مستغلة 100% من الأرض في حين أنو القانون ما يسمحش بأكثر من 3 طوابق فالمنطقة هذيكة و يجبرك باش تبعد على الأقل 25 ميترو على حافة البحر ( DPM ) و ما تستغلش أكثر من 40% من مساحة الأرض الجملية ( COS ) و نجنبك العديد و العديد من التجاوزات القانونية في هالبنية هذي ... و هنا نفهمك علاش نسيت ولا تناسيت ولا تفاديت باش تحكي على "المشروع السكني" هذاكا... أما عالأقل ما تقولش معاش فما حتى شبر يتبنا تقولش عليك تحكي على طوكيو و إلاّ هي القاهرة

- " فمن أين جاء كلّ هؤلاء ؟ ولماذا إنتظروا كل هذا الوقت للمطالبة بمسكن و قبر للحياة ؟" : أولاّ يا سي محمد كرومة, الكرم راهي ماهيش رزق السيد الوالد باش تستغرب كيفاه يجيوها عباد توانسة كيفك كيفهم ... حسب ما نتذكر فإنو التونسي يتمتع قانونيا بحق التنقل داخل الوطن, و كلمة "فمن أين جاء كلّ هؤلاء" ما تليقش فالحالة هذي ... أما بالنسنة لسؤالك الثاني فإنو الحق متاع ربي ما فهمتوش !!!! ( و كان فمة واحد بربي واحد فهمو يفهمني يمكن أنا فهمي ثقيل !!!! )

- " فيهم من عاد إلى موطنه و مسقط رأسه نهائيا و أراح و إستراح ... أما كل هؤلاء الوافدين اليوم فقد جاؤوا من داخل ولايات الجمهورية ... منذ عام أو عامين أو على الأقصى خمس سنوات وراحوا يطالبون بحق السكن " : جملة أقل ما يقال عنها "عنصورية" من نوع الي يخرجهم "جون ماري لوبان" (هههههههههههههه جات حلوة بالعربي هذي جون ماري " لوبان" ) متاع "الفرون ناسيونال" الفرنسي كي يبدا يحكي على المهاجرين.

- " جواب المسؤولين : لا اليوم ولا غدا سنوفر المساكن, كل يد خذات أختها, و حصّل ما في الكرم, اللي فيها يكفيها " : ما نتصورش حدّ مالـ "مسهولين" يقول كلام كيما هكة, مش على تربيتو و حسن أخلاقو, أما خوفا على بلاصتو ... و لكن هذا كلامك أنتي يعبّر عن حقد للعباد الي جاو "يزاحمو فيك" وفكولك شوية من أرض السيد الوالد.

- " فلماذا لا يقع إحصاء كل هؤلاء النازحين والتدخل لفائدتهم لدى جهاتهم لشدهم إلى أرضهم " : كمّل قول "نزوح" من ورى البلايك مش خير !!!؟؟؟ باقي عبارات معبية بالتهكم والحقد و العنصرية ... وربي تقولش عليك تحكي على دولة متقدمة هاجمين عليها "الحرّاقة المتخلفين" باش يغرقوها.

- " في الكرم وحدها أكثر من خمسين مقهى ويا ليتها كانت كلها معامل و مصانع وورشات تصنع لنا الرجال " : عيب عليك والله عيب, آشنوا معناها كل رواد المقاهي مهمش رجال وإلاّ الكرم ما فيهاش رجال ولاّ ما فهمتكش آش تقصد !!!؟؟ ...

أخيرا, و الله ما نلومش عليك أنتي يا سي محمد كرومة تنجم تكون تابع لحزب "اليمين المتطرّف الكرمّي" ( الكرم N.F ) مقلقينك ياسر العباد الي جاين يمارسو في حقّــهم بحثا عن لقمة العيش (والله لا فهمت كيفاه في الضر وف الراهنة توا متاع الانقسامات الجهوية في الكورة وغيرها و في الضر وف متاع مشكلة قفصة تقوم تكتب مقالة "عنصرية" بالشكل هذا ... و الله شيء يبهت !!!!!!! ) ... أمّا نلوم على رئيس تحريرك الي " قرا " و سمح بنشر حاجة كيما هكة في جريدة (بالرغم الي "الضريح" ما تنجمش ترتقي لمستوى واحد يقول عليها جريدة)