الاثنين، يونيو 30، 2008 على الساعة 10:14



مقال في مجلة "الملاحظ" بتاريخ 28 ماي 2008 نقلا عن هذه التدوينة

المرة هذية مش بش نحتاجو نبعدو بعيد و نمشيو للجرائد في نسخها الورقية أو الإلكترونية بش نلقاو البودورو.. المرة هذية نعتبرو رواحنا محظوظين لأنو البودورو ولى متوفرنا في البلوقوسفير بدون تعب أو عناء... فمة مدونة إسمها "صحفي تونسي" متاع صحفي في جريدة الصحافة داخل في عركة (الله أعلم شنية خلفياتها) مع رئيس تحرير الجريدة متاعو و مع عدد آخر من الصحفيين في الجريدة هذية (أعمل طلة مثلا هنا بش تاخذ فكرة على طبيعة الصراع بين الأطراف هذية)... الحقيقة ما فمة شي يدل أن العركة عندها طابع مبدئي أو حول محتويات... واضح إلي فيها برشة شخصنة و شوية تحليل (و في الواقع حتاش لتوة ماقريتش "مقال" أو "تقرير إخباري" من عند السيد إلي حالل مدونة "صحفي تونسي"... يعني ماذابينا كان يتصرف كصحفي بش نحسو أنو عندنا صحفيين في البلوقوسفير)..

على كل مش هذا المهم... إلي يهم في الموضوع أنو وضعية تصفية الحسابات هذية أتاحتلنا الفرصة أنو نطلعو على مقالات بودورو لزوز كتاب واحد يكتب في جريدة "الصحافة" و لاخر في مجلة "الملاحظ"... و تنجمو تشوفو من خلال ردورد السيد هذا (إلي من المفروض تكون عشرة ردود و توة وصل للرد نومرو خمسة و معمل بش يصيف و هو "يرد" في نفس الموضوع هذاية.. في ركن من المفروض مخصص لـ"فضاءات ثقافية") عادة قلت تنجمو تشوفو من الردود هذية قداش الشخصنة و الانتفاخ و الغرور إلي ما عندوش حتى شي يبررو (مثلا هشام جعيط مغرور أما يا أخي عندو علاش) هو إلي يحدد شنوة يتكتب و يتطبع في الحالات هذية... و الكلام هذا ينطبق على الزوز أطراف في العركة هذية...

المهم المعضلة بالحق أنو"المثقفين-صحفيين" (هومة طبعا يضيفو للنعوت هذية إلي هي بيدها في حاجة للإثبات نعوت من نوع "الكبار" و "المعروفين") هذومة الزوز يتعاركو على شكون يستعمل الفكرة العبقرية إلي طلع بيها واحد منهم (شوف صورة المقال الفوق من مجلة الملاحظ ليوم 28 ماي الجاري) متاع أنو "حاجة باهية كيف الدانماركيين الكفار يحرقو القرآن"... و علاش يقول القايل؟ على خاطر واحد من الزويز هذومة ("محمد المي") قالتلو جدتو وقتلي كان صغيرأنو صفحة قرآن المقطعة أو الملوحة يلزمها تتحرق بش ما يعفسوش عليها إلي يسوى و إلي ما يسواش!!!! و بالتالي حسب السيد هذا فإنو تكريم القرآن يكون بإحراقو!!! و المصيبة أنو السيد لاخر (بعد "مسامرة ليلية" أو "مسائية" أفشى فيها سي "المي" بالسر إلي قالتهولو جدتو) "سرق" الفكرة العبقرية هذية و كتب عليها مقال "أفحم" بيه إلي ماشي و إلي جاي... و إلي يدبي على الحصير!!!

توة بجاه ربي شنوة أنجم نقول أنا في الحالة هذية... الجهلوت هذومة في بالهم زعمة إلي مثلا ثمة غرفة كاملة في جامع القيروان تم فيها عبر القرون جمع بقايا مخطوطات و حتى أوراق من مخطوطات قرآنية معزولة لأنو حفظها يعتبر تكريم للقرآن ذاتو و أنو الغرفة هذية كانت المصدر الرئيسي لمجموعة المخطوطات القرآنية في متحف رقادة و إلي تعتبر وحدة من أهم المجموعات الأثرية فيما يخص المخطوطات القرآنية؟؟!! و زعمة في بالهم (الزويز "فطاحل" هذومة) إلي فمة مثال آخر أيضا ما يقلش شهرة وقع إكتشافو في جامع صنعاء؟؟!! و أنو حتى كيف ما يقعش الاحتفاظ بأوراق مقطعة من القرآن كانو المسلمين عادة "يرسكلوها" يعني يعاودو يستعملوها في كتابة مخطوطات آخرى؟؟!! و هل يعرفو الزويز هذومة أنو لولا تقاليد و عادات مكتبية عربية إسلامية كيف هكة فإنو ما كانش ممكن أنو يوصلنا عديد المخطوطات القرآنية القديمة الناقصة و المقطعة و غير المستعملة؟؟!! و زيد يعرفو (الزويز "جهابذة" هذومة) أنو العادات المكتبية هذية يشتركو فيها المسلمين مع اليهود.. و أحسن مثال هي غرفة/مخزن معبد "الجنيزة" في الفسطاط (القاهرة القديمة) إلي وقع فيها الاحتفاظ مش بنسخ مقطعة من التوراة أكهو بل حتى بجذاذات متاع معاملات مالية لمجرد أنها مكتوبة بالعبرية ترجع للقرن حداش ميلادي يعني للفترة الفاطمية؟؟؟!!!

و مبعد تقولي تكريم القرآن ("قاتلي جدتي") هو بإحراقو؟؟؟!!!

يعني كيف تولي فكرة شعبوية حالة حليلة من النوع هذا هي مصدر لمقال "عبقري" و المصيبة يتعاركو عليها زوز "مثقفين-صحفيين"من خلال التباري بمقالات منشورة للملأ (و تتشرى بالفلوس) نولي نتساءل هل أنجمو نلومو "الصحفي" من النوع إلي مش "ثقفوت معروف" كيف يكتبلنا حاجة بودورو؟؟!! المعضلة إلي واحد منهم (الزويز "فطاحل" هذومة) "أستاذ جامعي" يقري في النشئ

مرسلة بواسطةهيئة تحرير بودورو
التسميات:

هناك 8 تعليقات:

Gouverneur de Normalland يقول...

يا و الله أحوال

ملا نرجسية عند هالجماعة و و عرك و سب على فكرة طفولية ما جات شي و كأني بهم اكتشفوا طاقة موازية للبترول يحلوا بيها مشاكل العالم

هالجماعة أنا نسميهم عادة "ابادن" لأنهم كيف البيدون يعمل برشة حس كيف يبدى فارغ من داخل

غير معرف يقول...

اللي يكتب في الملاحظ معروف صبّاب كبير في وزارة الثقافة. العباد ما نجمش تحكي بحضورو

Hamadi يقول...

الدنيا قامت و قعدت و حبار و كاغظ و مطبعة على حكاية حولة .... ويوفى الحديث

Bechir يقول...

عيطة وشهود... على ذبيحة قنفود.

على مراد الله وبرا...

samsoum يقول...

طارق "فطاحل" جمع متاع شنوّا ؟
:)

3amrouch يقول...

سمسوم
فطاحلة جمع فطحل ويقال مثلا عمروش فطحول اي غزير العلم

black dark يقول...

ماهو شيء معروف : ما يقربع (ب3 نقاط على القاف) كان الفارغ على رأي خونا كلاندو

entrümpelung wien يقول...

الموضوع ممتاز جدا
entrümpelung
entrümpelung
entrümpelung wien