الجمعة، سبتمبر 07، 2007 على الساعة 16:18

بعدما رجعت لأمريكا مازلت في حالة ذهول ملي شفتو في تلفزتنا الوطنية و هذاكة علاش بش نزيد على التدوينة الفارطة تدوينة أخرى تجمع بين الصحافة التلفزية و الصحافة المكتوبة.... حبيت نلفت الانتباه لبرنامج جديد (حسب علمي) على التلفزة التونسية بتأثير واضح من المنافسة الفضائية الإخبارية و هو البرنامج إلي يتعلق باقتطاف مقالات من الصحافة المكتوبة... الغريب لهنا إلي البرنامج إلي يتبث في قناة تونس 7 و إلي إسمو "تقرؤون غدا" يقع بثوا حوالي الساعة التاسعة مساءا.... في حين هو يتحدث على الصحف إلي بش تصدر منو غدوة.... و إذا كان تحضير البرنامج يستوجب على الأقل ساعة و نصف و إلا ساعتين لاختيار المقالات إلي بش يقع قراءتها و التوضيب الفني و التقني للعرض التلفزي فإنو هذا يعني إلي الصحف هذية حاضرة و مطبوعة على الأقل السابعة مساءا.... و بالطبيعة هذا يعني إلي قرار التحرير طبع الصحيفة يرجع لقبل هذاكة يعني على الأقل ساعتين أخرين.... يعني تقريبا الصحف هذية تكون ضمنت على أخبار غدوة من الخمسة متاع العشية.... كاينو ماعادش فما داعي للصحافة بش تبع أي مستجدات بعد الخمسة متاع العشية.... كاينوا الأخبار و التطورات السياسية و الأحداث تتوقف و تكمل الخدمة و تاخذ الكار و إلا التران و تروح لديارها كيفنا كيفها الخمسة متع العشية ... في بريطانيا وين فما حياة صحفية نشطة فما ظاهرة الصحف المسائية و إلي عليها إقبال كبير ... و على حد علمي نفس الظاهرة معتمدة من قبل بعض الصحف المصرية.... لأنو ببساطة الدنيا ما تقفش الخمسة متاع العشية.... ديما فما حاجة يمكن تغطيتها صخفيا.... و إذا الواحد مايطالبش صحفنا لمحتحتة بش يكون عندها طبعات مسائية فإنو على الأقل يتوقع أنها تحافظ على حد أدنى من المهنية و ما تطبعش الجريدة حتاش لين تتهنى على بقية النهار... لأنو كي نضيفو ظاهرة التسرع في الطبع لظاهرة الأخبار البايتة و الكسل الصحفي فإنو يقع التخلي على وحدة من أهم خاصيات العمل الصحفي و هي السبق الصحفي.... لكن هل يمكن نطالبو بحاجة من النوع هذاية و قتلي أبجديات الكتابة الصحفية في مقالات الرأي و الأخبار مازالت نادرة في صحفنا؟

مرسلة بواسطةهيئة تحرير بودورو
التسميات:

هناك 5 تعليقات:

غير معرف يقول...

ما هو الواحد ماذا بيه في الصيف ما ياكلش حاجة سخونة هوكة حاجة بايتة في الفريقو تبدا خير.و في الشتاء هوكا نجبدوها مالفريجدار و أنسخنوها.

MoZZitude يقول...
أزال المؤلف هذا التعليق.
غير معرف يقول...

Ctrl+C et Ctrl+V : 5 secondes

MOmo يقول...

pieces de theatre =pieces boudourou trouees =jeux d,enfants :mais c,est un jeu des annees 50!

غير معرف يقول...

هالمدونة اكتشاف جديد بالنسبة لية، أما والله دورو ياسر في جرايدنا، ماذبيا لوكان يولي السم صحافة بوفرنك و لا بو صوردي
أنا خوكم مغلّب عليّ وليد الزراع و اللي يكتب فيه في الصريح، أنا متأكد اللي الورقة اللي فيها مقالو، سامجوني سميتو مقال، كيف يلفوا بيها كسكروت يولي يعمل الجاير
ما لقيتش كلمةتحفظ الذوق العام باش نوصف بيها هاك الشي اللي يكتب فيه
تقولولي آش لزك تقرالو، نقلكم نقرالوا ديما صدفة،و كيف ما تعرفوا، حلان جريدة تونسية هو بمثابة الدخول الى تواليت في قهوة، انت و زهرك آش باش تلقى