الأحد، فبراير 01، 2009 على الساعة 16:12

صحيفة "الحدث" -الاربعاء 28 جانفي 2009 - لقراءة كامل المقالة اضغط هنــا

في كل مرّة يتمّ فيها الحديث عن الرقابة و الحجب في مجال الانترنات في بلادنا إلا و يكون الفايس بوك هو الدليل الدامغ و الحجة الغير قابلة للدحض على وجود الصنصرة الممنهجة و الفيلتراج الاوتوماتيكي لعدد كبير من المواقع و المدونات. و القرار الرئاسي اللي اذن برفع الحجب على موقع الفايسبوك كان وضع العديد من التخصّصين في اخفاء الحقيقة و تغطية عين الشمس بالغربال في مآزق كبيرة و مواقف محرجة في عديد المناسبات.
فتوصّل الجميع الى تبرير موحَّد (منعرفوش شكون طلع بيه الاوّل ) وهو انو مسألة الفايسبوك كانت حالة شاذة و اجتهادات فردية و تصرّفات معزولة ماتعبّرش على السياسة العامة في البلاد . وتم اعتماد الرواية هذية كرواية رسمية و توضيح رسمي لعملية حجب الفايسبوك ,و تكرر الكلام هذا كيما صرّح "بوبكر الصغيّر" (مدير مجلة الملاحظ) على قناة حنّبعل , أو كيما ردّ السيّد وزير العدل و حقوق الإنسان على مقدّم برنامج 'في الصميم" على قناة البي بي سي العربية (حلقة الاثنين 26 جانفي 2009)...

الصحف التونسية, باش توضّح المسألة للمواطن البسيط اللي بعمرو ما سمع بحاجة اسمها فايسبوك في حياتو , و باش ما تخلّيش فرصة لنفس المواطن البسيط باش يتساءل علاش كل مرّة , يتسأل فيها صحفي او مسؤول على الفايسبوك ...يتلعثم و يدخل بعضو و يبدأ يجاوب بتوتّر واضح و بطريقة غير مقنعة.
و احنا في بلادنا -والحمد لله- المواطن مهما كان تكوينو او خلفيتو او وضعو الاجتماعي, طوّر آليات ينجّم من خلالها يقرأ الكلام اللي ماتقالش و يعرف الحاجات الغير معلنة , فقط من خلال حركات المسؤولين و طريقتهم في الخطاب و التعبير خاصة في المواقف المباشرة

الصحف التونسية كيما قلت باش تجنّب المواطن التساؤلات هذية الكل و باش تقصّر عليه الثنية فإنها اختارت طريقة التشويه و اعطاء صورة مغلوطة عن الانترنات عموما و الفايسبوك خصوصا . و اللي عمرو ما دخل الانترنات كيف يشوف عنوان كيما العنوان على الصفحة الأولى متاع الحدث ما ينجّم كان ينفر من الفايسبوك و يسبّلو جد بوه الاول, و اذا نهار من نهارات واحد من اولادو جبدلو على الموقع هذاية فالاكيد انو باش يحلف على الانترنات كان مازالت تدخل دارو , فالفايسبوك حسب "الحدث"هو " جنس-دعارة-مخدّرات-عنف - ارهاب- تطرف - ممنوعات..." و فوق هذا الكل (و بما انو الظرف الحالي هو ظرف متاع حرب في غزة ) زادوا المخابرات الأمريكية باش حتى اللي يبدى متسامح مع الامور اللي ذكرتها توة , مستحيل يسمح للمخابرات الامريكية تجنّدوا او تاخذ معطياتو الشخصية على الفايسبوك و ربما تستعملها لضرب الفلسطينيين.

صحيفة "البيان" - يوم الاثنين 26 جانفي 2009 - لقراءة كامل المقالة اضغط هنــا

صحيفة البيان من شيرتها عملت ريبورتاج حول نفس الموضوع , سألو فيه مجموعة من الشباب على الفايسبوك و كانت الردود في مجملها تأكّد انو الموقع هذا هو وسيلة لتمضية الوقت و ربط العلاقات و الاستماع لموسيقى الهاوس (بالذّات) و مشاهدة مقاطع الفيديو .
و رغم انو الريبوتاج متاع "البيان" يبقى ديما اكثر حيادية و حرفية من اللي تنشر في "الحدث" و اعطى صورة اقرب للواقع و حكى على امكانية تكوين مجموعات بين المشتركين تجمع بيناتهم لأهداف يمكن انها تكون نبيلة كيما دعم و مساندة غزة...الا انو زادة فمة الجانب الآخر وهو المبالغة في تصوير الخطر متاع الفايسبوك. باعتبار معظم الشباب اللي سألوه هو من تلامذة الثانوي, و معظمهم كان في
المقاهي اللي فيها الـwifi , فتتوضح الصورة و يظهر الفايسبووك كخطر يتهدد المستقبل الدراسي لابنائنا .




أما المقالة الثالثة متاع الصريح ليوم امس فيمكن ادراجها في نفس السّياق (الحملة على الفايسبوك) و لكننا باش نفردوها بتدوينة مستقلّة على خاطر الحكاية فيها برشة خفايا و تعقيدات على موقع الفايسبوك بيدو. و فيها برشة جزئيات شخصية تمسّ من شخص السيّد "سمير الوافي" و عدد من مشتركات الفايسبوك.
البقية في التدوينة الجاية

مرسلة بواسطةهيئة تحرير بودورو

هناك 6 تعليقات:

غير معرف يقول...

Matabtach alina bellehi lool

غير معرف يقول...

تو هذا كلام .واليوم بركة سمعتو في القهوة يلخي هو المريكان والا الصهاينة كان حاجتهم بحاجة لقاو كان الفايسبوك وزيد بزيادة اجهل امة بالانترنات هوم احنا .ام انقولولهم هاتو الصحيح .....اش ثم بالضبط

Hanen Bettayeb يقول...

J'ai lu l'article que vous consacrez à ce faux journaliste occasionnel qu'est Ali Ben N'sib.
Je vous propose d'aller lire le blog de notre groupe ORGASM sur HAUTETFORT à l'adresse suivante:
http://orgasm.hautetfort.com
Vous y trouverez beaucoup d'articles à propos de la presse tunisienne et spécialement contre As-Sarih et ses journalistes politiquement corrects.
Merci beaucoup

غير معرف يقول...

Je me permets de vous proposer ce lien vers un livre qui fut publié récemment chez Lulu.com. Il s'appelle "As-Sarih, journal manipulateur", écrit par Mohamed Hajjeji, un journaliste.
Il apportera des réponses à plein de questions urgentes et importantes...!
http://www.lulu.com/content/hardcover_book/as-sarih_journal_manipulateur/6362781
Merci pour la visite!

غير معرف يقول...

سمير الوافي انسان سخيف جدا ومريض، انا خدمت معاه في الصريح، ومن نوع اش يا ذبانة ما ثمة كان انا. وهو حل الصرة تلقى خيط.. يمكن حتى الخيط ما تلقاشو.. ومرة حط ايدو على كتف زميلتنا، وفاحت فيه بالعار وما خلت ما قالتلو قدام الناس الكل، وهو يضحك موش هنا على )خاطر ناقص رجولية وسفيه

entrümpelung wien يقول...

الموضوع ممتاز جدا
entrümpelung
entrümpelung
entrümpelung wien