الخميس، يوليو 10، 2008 على الساعة 06:02



مقتطفات من الحلقة 100من برنامج "الصراحة راحة" (فضائية حنبعل التونسية) بثت يوم 4 جويلية 2008
إهتمام مدونة بودورو بالصحافة المكتوبة فقط ما يعنيش إلي ماثماش بودورو تلفزي مثلا... هو كان تجي تشوف ربما البودورو التلفزي هو الأكثر إنتشار و يوصل لـ"عمق" االحفرة الشعبوية أكثر من غيرو... مثلا توة برنامج كيف "الصراحة راحة" متاع شخص يقدم نفسو كـ"صحفي" (يكتب أيضا عمود أسبوعي في صحيفة يومية متحصلين بعض صحفييها و لا فخر على ميداليات ذهبية من مدونة بودورو)... كيفاش الواحد ينجم يقيمو كيف يقرر بش يتصرف كشخص بالغ ملقح ضد الصياح و "الحوارات" البودورو المتوفرة في مليارات القعدات في القهاوي و غيرها؟

هذية مقتطفات من الحلقة ميا "أفضل 2008" متاع البرنامج.. و تنجمو تسمعو بكل الجدية الممكنة مقدم البرنامج يتحدث على البرنامج متاعو بوصفو منبع "الحقيقة" و البرنامج إلي "يصنع الحدث" و إلي يتعرض لـ"حقد الحاقدين" و البرنامج إلي يتكلم من غير "ماكياج"... بالطبيعة كيف نسمعو كلام كيف هكة من غير مانعرفو المشهد التلفزي التونسي إلي يعيش حالة ركود منقطعة النظير خاصة على مستوى البرامج الحوارية و برامج "الصراحة" بشكل عام... و زادة كيف نسمعوه من غير ما نعرفو إلي البرنامج هذا ضيوفو "نجوم" في سماء فنية قاحلة... ربما وقتها نفهمو و نتفهمو الكلمات المذكورة الفوق متاع "الحقيقة الحقانية" إلي قد راس مقدم البرنامج... أما بصراحة (و لهنا التصريح من النوع هذا يحسسنا براحة خاصة) علاش الترهدين و الركاكة؟! توة تبهنيس هذا و إلا شنوة؟! آخي ينجم السيد هذا يفرق بين "الصراحة" و "القباحة" و "القبح"؟! على خاطر بصراحة مانراش إلي ينجم يفرق بيناتهم كيف يشد يسخسخ عزوزة على قدها كيف "الحاجة" فاطمة بوساحة على خاطرها ماتعرفش تقرى و تكتب و يعتبر نفسو صحفي "مثقف" عمل حوار قمقوم "صنع الحدث"... و أحسن مثال على "تميز" البرنامج هذا
هو "الحوار الصريح" إلي جمع الزوز "كوميديانات" لمين النهدي و رؤوف بن يغلان إلي اعتبرها مقدم البرنامج "أفضل" و "أمتع" و "أحلى" حلقة خاصة أنو تكتب على خاطرها 121 "مقال" (ردو بالكم مش 122 و مش 120 بش تعرفو شنوة يعمل السيد هذاية في أوقات الفراغ متاعو) 121 "مقال" في الصحافة التونسية (دليل آخر على الازدهار إلي تعيشو صحافتنا تبارك الله عليها)... المعضلة إلي السيد المقدم المحترف إلي مشاركتو في الحوار هذا اقتصرت على جملة "قصو الحوار" ما يعرفش كيفاش حتى يقعد كيف يجيب زوز ضيوف... حتى العفوية الواحد يلزم يتذكر أنها ما تعنيش الفوضى و الصبيانية المهنية


ثمة جملة وحدة تستحق الاهتمام في أقوال مقدم البرنامج... وقتلي قال إلي يهمو مش كلام "الحاقدين" (إلي طبعا متربصين و و كذلك مكدسين بالملايين بين بحيرة البيبان و جبال القصرين) و لكن إلي يهمو نسبة "المشاهدة العالية" للبرنامج هذاية... و طبعا مش لازم نضيع وقتي و وقتكم بش نذكر مقدم البرنامج إلي نسبة "المشاهدة العالية" مش ديمة مؤشر على "النجاح" و "التميز" إلا إذا كان نجاح و تميز في الرداءة في الحالة هذية... لأنو وقتلي تعمل فضيحة و عيطة و شهود و تسميه "برنامج" كيفاش ما يحققش "نسبة مشاهدة عالية"؟!
بالله في وقت إلي التونسي ما يسمعش توانسة يتحدثو بصراحة في تلافز تونسية و يحسسوه بالراحة آش قعد قدامو بخلاف قعدة متوسطة متاع تقطيع و ترييش و أوقات مستقطعة يسود فيهم الازبهلال المشترك متاع المقدم و ضيفو... و بين كل إزبهلال مشترك و إزبهلال مشترك آخر ثمة شوية تخلويض متاع مقدم عامل ملف و يحقق مع واحد من "النجوم" متاعو بكل "صراحة" حول مسائل مصيرية في مستوى مثلا هل يقضي من خضار الحومة و إلا من الخضار متاع الباساج... قبل ما يفحمو طبعا بالحقيقة الحقانية متاع أنو طلع يقضي من المارشي سونترال؟! يظهرلي ما ثماش "تميز" أكثر من هكة

البرامج التلفزية البودورو متاع التسخسيخ و تطييح القدر مش إختراع بودورو بالوافي... هي موجودة في تلفزات العالم الكل... لكن يولي عندها "قدر" (يوزن 121 "مقال") في وضعية بودورو

مرسلة بواسطةهيئة تحرير بودورو
التسميات:

هناك 15 تعليقًا:

3amrouch يقول...
أزال المؤلف هذا التعليق.
3amrouch يقول...

انا فمى جملة لفتت انتباهي بغض النظر على محتوى البرنامج والي مانجمتش في كل حلقة نوصل لاخره هو كيف حب يشكر رئيس متاعو في العمل ياخي قالو بدون تملق وبكل صدق واخلاص ووفاء واعتراف بالجميل اتوجه بشكري الخاص للسيد عربي نصرة الذي شجعنا ودعمنا ووفر لنا كل ظروف النجاح ومنحنا كل ثقته المهمة والضرورية وقفلة النهاية قالو تطور البرنامج بتوجيهاته
لكن فمى ضياف اههه سامحوني ضيوف

Bel Malwene يقول...

هههههههههههههههه !!!! حلوة ياسر منو بدلنا البوزيسيون" هههههه ... هو بالحق ما ينجم يجي كان برنامج متاع تبديل "بوزيسيون" هههههه ... ملا مستّك

Werewolf يقول...

أيّا بالمناسبة نوجّهلو تحية بما أنّو حسب ما قال في حلقة رؤوف بن يغلان و لمين النهدي أنّو يتابع في المدونات... نجي توة للمهم... النقد و الحقد حسب تعبيرو عاونوه باش يتحسن... مانكونش قاسي عليه وقتلي نقلّو أنّو شادد صحيح و مكبّش في الرداءة

غير معرف يقول...

yar7am waldik!!

غير معرف يقول...

bonjour tt le monde je voulais vous préciser un détail, j'ai personnellement créé un groupe sur facebook intitulé Samir el Wefi please shut up dans lequel on vient de dépasser les 500 adhérents chose qui n'a pas plu à Mr SW et le pire que cette personne est entrain de s'attaquer en pv à quelques membres qui l'ont connus et côtoyés..je vous invite à visiter le groupe :
http://www.facebook.com/groups.php?ref=sb#/group.php?gid=20360166252

Tarek طارق يقول...

هيكل مدونة بودورو معاك ضد بودورو بالوافي

غير معرف يقول...

walahi mala loukza hal 3abd !!!

غير معرف يقول...

franchement vous n etes pas actifs
ecrire un post par mois avec toute la médiocrité qu'on trouve dans les journaux est très insuffisant
devrais je qualifier les blogueurs de boudourou d'etre a leur tour des blogueurs boudourou
je n'oserais jamais le faire

غير معرف يقول...

boudourou.pulitzer@yahoo.fr
مدونة بقيمتها وبالعربية شيء يفرح
كان العنوان الإلكتروني : نقطة فر
يلعن الإستعمار باقي مسلط على عقولنا
لما لا نقطة تن أو نقطة كم
كم تبقى عالمية
ملاحظة صغيرة إن شاء الله تتقبلوها بصدر رحب.

غير معرف يقول...

يا فرحات براس أمك يزي بلا تخلويض.
تقول انتي استعمار أمريكي أحسن من استعمار فرانساوي. توة انتي "فر" تعملك حساسية و الياهو بيدها ما تقلقكش. سيب القشور و اتلهى بالمضمون خيرلك

غير معرف يقول...

كلمتك قرأتها باستحسان
الكوم عالمي في تونس وفي كل البلدان
شكرا يا فادد على ذكر الأمريكان
غيرت بسرعة على مكتوب.كوم من عمان

غير معرف يقول...

شكرا على التفهم يا فرحات
:)

khayati يقول...

ce Monsieur ne "pond" pas une chronique hebdomadaire in al-çarih, mais elle est QUOTIDIENNE Bon sang de bon sang...

غير معرف يقول...

بالله حتى حد ما انتبه لعبارة هـ "الوافي" وهو يقدم في البرنامج كيف يقول : 90 في ال100 من النجوم "قبلوا اللعبة"يعني الحكاية واضحة والحقيقة أنو قناة حنبعل في 90 بال100 من برامجها قائمة على ها اللعبة :المفقود في تونس7 هي الجرأة لكن لكن الواقع يأكد اللي هوما يلعبوعلى المشاهد المسكين اللي جادة عليه حكاية الصراحة والحقائق في الصحافة . والله أحسن لقب ينطبق عليها صحافة بودورو